Ang walang hanggang tots tungkol sa pag-ibig. (Kailan nga ba matatapos ang mga tanong…?)

Pagod na ako, pero ang utak ko hindi pa rin mapakali sa kaiisip. Siguro nalamanan na naman ng mga katanungan… na siyempre, may kinalaman tungkol dun sa title.

As usual, napag-usapan na naman ang tungkol sa pag-ibig. Wala yatang araw na magkakasama kami ng mga kaibigan ko na hindi namin iyon napag-usapan. Hindi ko na nga matandaan kung kailan ang huling beses na hindi iyon ang topic. Tch.

Kadiri, kabilang talaga kami sa mga hopeless romantic na taong lihim na naghahanap at naghihintay sa kanilang greatest love. Pucha, di na rin naman kasi ako bumabata, hello! Pero yeah, magapakabisi pa akong magpayaman. May mga maghihintay naman eh! Char! Kunwari mahaba buhok ko.

Pero ah, speaking of greatest love. Ayon kasi sa nabasa kong libro, magkaiba raw ang “greatest love” mo sa “correct love” mo. Saang libro? Para Kay B ni Ricky Lee. At narealize ko na… oo. May pagkakaiba nga sila.

Kaso itong si friend, nung nabanggit ko sa kaniya ‘yon, ang sabi niya… “Magkaiba pa ba ang great love sa correct love?” na kapag daw pinili mo ang correct love ay yun na yung great love, kasi iyon yung best eh. Maski ako nalito, pero siyempre, iba kasi yung point.

Ang point kasi… dapat ang makakatuluyan mo ay ang correct love mo. Kasi iyon yung tama eh. Correct nga eh, hello. Ayon ang dapat — para walang masaktan, walang maipit, walang ibang mahihirapan. In short, para lahat happy. Malaki kasi ang tendency na ikaw lang at ang great love mo ang magiging masaya kung iyon ang pipiliin mo. Masaya ka nga, pero deep inside you know, at sa tingin ng iba hindi tama.

Isa pang katanungan na gumugulo sa isip ko na kaakibat nung una. Paano kung kailangan mong pumili between your “choice” and your “love“? For example, may mahal ka, pero hindi siya ang pinili / pipiliin mo dahil sa mabigat na rason, masasabi mo bang mahal mo pa rin siya eh nag-let go ka? Shaks ‘no. Dito na yata pumapasok yung tanong na… mahal mo ba talaga kasi pinakawalan mo o hindi kasi hindi mo pinaglaban? Nakakadugo. Ang sarap ngang gawan ng story, ta’s yung ending ko pinili niya yung “love” niya pero kasi ang hirap kalabanin nung reason eh. Ang challenging! Pero at the same time, nakakalungkot isipin. Kasi… bakit may pagtingin na mali about sa love? At bakit kailangan mong pumili?

Ahh, naalala ko tuloy yung sinabi ng kapatid kong panganay… “Nagiging tama o mali lang naman ang pag-ibig depende sa taong tumitingin”. ‘Di ko nagets nung una ko iyang narinig, pero ngayon naiintindihan ko na. Siguro nga… nasa tao na lang ang kasagutan sa mali o tamang pagmamahal.

Kung makasulat naman ako rito, akala mo naman sobrang expert ko na sa pag-ibig, but the truth is, maski ako nag-iisip kung talaga bang nakaranas na ako ng gano’n. Or kung alam ko ba talaga ang ibig sabihin no’n. Yung true love, ika nga, sa isang tao. Eh kasi, ang pananaw ko na ngayon sa ganiyan, puro feelings na lang eh. Kumbaga, emosiyon mo lang iyan na nararamdaman. Mababago. Mawawala. Pero ang sagwa naman kung ang panghahawakan mo na lang ay ang “commitment”. Ang sound bitter ano. Pero kasi… hindi ba nagsisimula lang naman ang lahat sa isang katiting na emosiyon? Tapos saka na lang madedevelop.

Pero ah, ewan. Hindi ko pa nga rin naiintindihan ng lubos. Sabagay, iba-iba naman kasi talaga ang klase ng pag-ibig. Iba-iba ang paraan ng mga tao para maparamdam nila iyon sa’yo.

Pero ah ulit.

Lutang na ako. I must rest.

Sa taong magmamahal sa kanya,

Unang una, gustong kong sabihin na salamat dahil sa dinami-rami ng babae sa mundo, siya ang pinili mong ibigin. At huwag kang mag-alala, sigurado akong mamahalin ka din niya.

Kung mababasa mo man ito, gusto kong malaman mo yung mga hilig niya. Yung mga bagay na nagpapasaya sa kanya, yung mga salitang ayaw niyang marinig, at yung mga aksiyon na gusto niyang maramdaman mula sa iyo. Gusto ko din na malaman mo kung anong klase siyang babae, kung ano ang personalidad niya, ugali niya at kung gaano siya kadaling mabasag.

Siya’y tahimik. Gusto niya na palaging nag-iisa pero takot siya ng walang kasama. Kapag hindi siya nagsasalita, ikaw na ang unang kumausap sa kanya. Ikaw na ang gumawa ng paraan para mapadama mo sa kanya ang ibig sabihin ng katahimikan sa paraang hindi niya mararamdaman na wala siyang kasama. Hindi ko alam kung paano, basta ikaw na ang bahala sa kanya.

Ang babaeng pinili mong mahalin ay masiyahin. Gusto niya na palagi siyang nakangiti. Gusto niya lagi na ikaw ang maging dahilan ng bawat pagkurba ng kanyang mga labi. Kaya naman gawin mo ang lahat para alisin sa puso niya ang lahat ng lungkot, inggit at galit. Gawin mo ang lahat para mapadama mo sa kanya na handa kang maging katawatawa huwag lamang siyang umiyak. Ipadama mo sa kanya na kayang-kaya mong gawing makulay ang buhay niya sa piling mo. Malaki ang inaasahan niya sa iyo, kaya gawin mo kung ano ang dapat. Huwag mo siyang paiiyakin at sasaktan.

Gusto niyang mahawakan ang kamay mo at maramdaman na ang kamay niya lang ang hahawak nito. Akbayan mo siya palagi kapag naglalakad kayo. Gusto niyang maramdamang ligtas siya bawat oras sa piling mo. Nais niyang makasiguro na nariyan kang sumusuporta sa kanya kapag napapagod na siyang tumayo. Hawakan mo siyang mabuti, huwag mo siyang bibitawan.

Mahal niya ang musika. Kaya naman haranahin mo siya. Kahit na hindi maganda ang boses mo, kapag narinig ka niyang umawit, paniguradong magugustuhan niya ito. Kapag alam mong gabi na’t oras na ng pagtulog, ikaw na ang magmistulang radyo na mag-iingay upang siya’y mahimlay. Kantahin mo ang paborito niyang kanta, bigkasin mo ang mga gusto niyang liriko.Magugustuhan niya ito, at lalo ka niyang mamahalin.

Tandaan mong hindi siya mahilig sa bulaklak. Naniniwala siyang hindi ito dapat na gawing simbolo ng pag-ibig. Dahil ito’y namamatay, nabubulok at nalilimot. Kapag gusto mo siyang bilhan ng bulaklak, ipagpinta mo na lamang siya nito. Kahit ang isang maliit na piraso ng papel na may guhit na rosas, matutuwa na siya. Hindi na niya kailangan ng magagandang bulaklak. Sapat na ang kasama ka niya sa buong araw.

Marami siyang pangarap — isa na ang makasama kang tumanda. Gusto niyang itulak mo siya para maabot ang kanyang mga ambisyon. Kahit na imposible, gusto niyang palakasin mo ang loob niyang makuha ang ninanais na buhay. Huwag mo siyang hahayaang manghina. Ikaw sana ang maging lakas niya.

Ang babaeng pinili mong mahalin, ay magmamahal din sa iyo ng lubos. Isa ka sa mga lakas niya. Ikaw na ang magiging buhay niya.

Ang babaeng pinili mong makasama ay umaasang makakaranas ng totoong pagmamahal na manggagaling sa iyo. Kaya naman huwag mo siyang bibiguin sa pagtupad nito. Dahil kapag nagkataon, masasaktan siya ng todo.

At ang babaeng tinutukoy ko sa liham na ito…

…ay ako.